政情：新民黨成立 林鄭撐場箍煲
前保安局局長葉劉淑儀牽頭組成嘅新民黨，尋日舉行領導層就職儀式，象徵新黨正式成立。打開新民黨份顧問團名單，退役高官滿目皆是，好似前衞生福利司黃錢其濂、前資訊科技及廣播局局長鄺其志同前廉政專員羅范椒芬咁，前郵政署署長譚榮邦更入黨做執委，變相組織民間「ＡＯ（政務官）黨」。ＡＯ族群畀面文化盛行，前同僚組黨大慶，局長空群到賀，最矚目係上年為舊樓「強拍」同葉劉隔空駁火、勢成水火嘅發展局局長林鄭月娥現身，擺明想嚟一笑泯恩仇。
自由黨中聯辦隱形
政治世界敵友難分，葉劉組黨，直選戰場以後多隻香爐多隻鬼，左中右政黨真真假假都好，都要畀面。唯獨同新民黨副主席田北辰「鬧翻」嘅自由黨，及一向同田二少唔啱嘴形嘅經濟動力，就只送花牌，頭面人物一個都冇現身。咁又難怪，外界估計，新民黨走中產專業路線，對自由黨票源影響最大，唔通要自由黨高層嚟祝新民黨大展鴻圖咩！中聯辦亦無人到賀，葉劉講笑話，中聯辦無刻意祝賀佢，「可能佢哋仲要觀察吓啦。」
田二少「冤家」唔到賀，葉劉嘅高官對頭人卻突然現身，令在場人士無不訝然，呢個就係人稱「好打得」嘅林鄭月娥。林鄭上年強推舊樓「強拍」新政，被葉劉炮轟強搶民產，林鄭就喺電台節目反唇相譏，昔日同僚反目成仇。林鄭尋日畀面出席新民黨成立儀式，令一地眼鏡碎之餘，亦令人聯想到佢係嚟主動伸出橄欖枝。記者尋日重提舊怨，林鄭話：「議會嘅嘢，係好平常嘅事。」潛台詞唔知係咪想叫葉劉公事公辦，唔好諗住報仇。
事後，葉劉話批評時政對事唔對人，政府有錯照樣批評。其實未來兩年新民黨要進軍區會同立會，葉劉炮轟當局，又點會肯手軟呢？不過政府喺立會要攞每一票都係血汗，林鄭今次泯恩仇行動，講穿咗都係由實際出發嘅唧。
擬派十人角逐區選
新民黨現有二百六十六名黨員，口號係服務全社會，今年區選將派約十人參選，但該黨應該唔會派人參選二○一二年立法會區議會「超級議席」。新黨初立，葉劉言論謹慎，尋日唔肯正面回應係咪支持基本法廿三條立法，又指功能組別未必要廢除，可以「一人兩票」形式處理。被問到選特首，葉劉答番一貫答案，話目前專注發展黨務，暫時無其他諗法。