中環耳目：莊學山茹素 食豆至夠「營」
潮流興食素，有啲人為咗撐環保，有啲人就為咗信仰。不過對於應酬多多嘅城中名人嚟講，要做到日日食素一啲都唔容易。早前卓妮喺香港佛教聯合會成立六十五周年活動度，見到篤信佛教嘅潮州商會永遠名譽會長莊學山，佢話如果冇應酬，佢同太太就會喺屋企盡量食素，仲教路要食唔同顏色嘅豆類至夠營養。
年紀大愛清淡
莊學山平時公務繁忙，經常要出席大大小小嘅場合，好難維持食齋嘅習慣，所以如果冇應酬嘅日子，就會喺屋企食素，始終年紀大咗，食番清淡啲好。不過，長期食素要特別留意營養均衡，佢嘅心得就係要食番唔同顏色嘅豆，咁先至可以補充唔同嘅營養。
莊學山同太太好有慈悲心，早幾年成立咗「慈明佛教園地」，為弘揚佛理盡份心力。當日活動係佛界一年一度嘅盛事，晚宴梗係全素食，卓妮見莊學山同太太食得好滋味，終於應酬飯都有齋食，唔使就住就住喇！