中環出更：名媛皮草出籠 禦寒晒貴氣
Fur Look今年大行其道，氣溫急降，正是着大皮草嘅好時機。名媛淑女尋日喺沙田馬場統統出動皮草，水貂、狐狸毛，或是大玩動物圖案Animal Print外衣。睇名太們點演繹皮草，就應該對今年嘅潮流方向有所啟示。
寒風凜冽，名人個個包到冚入場。政壇富婆張永珍剛由上海公幹返港，唔覺香港太凍，但着多件皮草抗寒無壞，件衫設計別致，將皮草混合布料，打破皮草予人老氣橫秋感覺。張永珍話，佢有間屋喺瑞典，零下廿五度嘅嚴寒都唔怕，有長身皮草禦寒，就夠晒溫暖。
「造紙大王」李運強太太都着上紫色毛毛褸入場為愛駒打氣，李太笑言好少shopping，件褸係仔女幫佢買，家人知佢怕着得花綠綠，首選淨色毛毛褸，高貴又大方。奇怪？老公李運強熱愛賽馬，點解今日唔見佢？原來係去咗東莞出差，估唔到周日都搏殺做嘢。
恒和珠寶主席陳聖澤嘅太太就大玩Animal Print，以豹紋褸襯皮褲。陳太話，喜歡皮草變化多端，着上佢喺零下十度嘅芝加哥行街，感覺無敵。
王英偉太太環保停買皮草
浸大校董會主席王英偉嘅太太都加入皮草一族，佢以紫紅色皮草披肩點綴灰色褸，恰到好處，不過呢條頸巾，原來係十年前買落嘅。王太幾年前起關注環保，已停買皮草嘞。
「精英大師」馬主施雅治太太Betty鍾意貂鼠毛，鍾意佢夠輕，佢尋日着嗰件長貂鼠毛夾裡長褸配長靴，天氣再凍啲都冇有怕。
卓妮