公民黨尋日改選新一屆領導層，三個有人競爭嘅高層職位，有兩個都由候任黨魁梁家傑支持嘅候選人以壓倒性票勝出，唯獨係最重要嘅黨主席職位、獲袋巾梁力撐嘅陳家洛，僅以八十一票對七十票之差，險勝對手創黨元老鄭宇碩，反映黨內的確有唔少人不滿陳家洛，對佢嘅處事用人手法同激進立場、包括力主公民黨參與「五區公投」有微言。
對於今次低票當選，陳家洛強調會虛心聆聽黨內不同聲音，不會做一言堂，並會努力走訪各地區支部同其他泛民黨派，加強溝通合作。
新任黨魁袋巾梁亦重申今次選舉係君子之爭，兩位主席候選人票數咁接近，純粹係因為兩人都咁重量級，黨內絕對冇路線分歧，亦唔會因而分裂內訌爆發退黨潮。
不過，當記者要求當選嘅陳家洛同落選嘅鄭宇碩握吓手影番張靚相時，兩人即時都冇乜反應，有執委更喺後面大叫「唔使喇」，最後都係冇握到手。喺選舉開始前，更有傳不滿陳家洛嘅執委，拉起橫額高調力撐鄭宇碩，擺明係要落陳家洛面。公民黨今後睇嚟有排煩囉！