政情：網球精英賽 名人睇得投入
香港網球精英賽2011尋日進入總決賽，網球愛好者雲集維多利亞公園網球場，名人球迷包括香港網球贊助人協會副主席田北俊及副會長李明逵、藝術發展局主席王英偉（Wilfred）、香港專業及資深行政人員協會會長胡曉明（Herman）、港協暨奧委會義務副秘書長霍啟剛、歌星陳奕迅（Eason）等。大家欣賞球賽時相當投入，每遇上精彩入球均報以熱烈掌聲。
前警隊一哥李明逵打咗網球十幾年，平均一星期打三日，閒時仲有跑步及行山，保持身體健康。Herman都好鍾意打網球，球齡仲耐過李明逵，幾歲已經學打網球，而佢自己都有參加比賽，幾年前曾贏得五十歲組別冠軍。至於Wilfred就話自己睇波多過打波！三個大男人幾乎成個下晝都喺度睇決賽，認真好有癮。
近日成為各大音樂頒獎禮大贏家嘅Eason，喺下晝三點半同兩位朋友入場睇女單決賽，見佢身穿牛仔褲、冷帽及波鞋，一邊飲汽水一邊睇波，相當投入。