政情：盛智文為保育出錢出力
無見一排，原來海洋公園保育基金主席陳晴（Judy）升咗級做媽咪，尋日俏媽咪同海洋公園主席盛智文同老友協成行集團董事總經理方文雄，一齊出席第十六屆「海洋公園保育日」，宣布同廣東海洋江河生態保護促進會簽訂合作框架協議，加強粵港兩地海洋資源保育經驗及技術交流。
啱啱做媽咪嘅陳晴，對於屋企新成員，佢唔肯透露太多，只係話依家全職做義工，今年會繼續到貧窮地區做探訪，即使掛住BB都會如期出發。Judy仲話依家屋企有五個寶貝，有仔有女，有大有細，唔知包唔包埋隻「初生之虎」呢？Judy笑咪咪封嘴唔答。
至於佢老友兼羽毛球波友方文雄，就同太太着住有塗鴉圖案嘅情侶裝出席，真係襯到絕。
至於百足咁多爪嘅海洋公園主席盛智文，一提保育更加義不容辭，話上任以來以私人名義捐咗逾三百萬畀個基金會，畀啲大學生去東南亞唔同地方做保育工作。佢仲謙稱自己唔識保育，所以出錢等後生仔做。佢呢個義工主席，真係出錢又出力！