政情：彭徐美雲膺女童軍總監
早前爆出超齡總監違規參選醜聞嘅香港女童軍總會，總監一職之爭已塵埃落定，副總監彭徐美雲擊敗名譽副會長李周美枝，當選新一任香港總監，四月廿六日起正式接替任滿嘅超齡總監邊陳之娟，任期三年。呢場女童軍版嘅「金枝慾孽」大結局，意味連串嘅「告密」行動可以暫時鳴金收兵，一班女童軍闊太可以安樂過番個愉快嘅農曆新年。
女童軍總會尋日下午三時舉行會務委員會特別大會，選舉新一任總監，共有八十多名女童軍高層出席投票，盛況空前。今次選舉打破過去一人提名自動當選嘅局面，為女童軍總會締造首次競爭嘅歷史，副總監彭徐美雲及名譽副會長李周美枝兩名候選人旗鼓相當，傳聞背後各有名媛闊太發功支持，但最後彭太以五十七票對李太二十七票大比數勝出。
會議一直開到四時三十分結束，但選舉落敗嘅李太喺三時四十五分率先步出會場，向記者宣布彭太「得獎」當選總監，兼且承認自己落敗，但佢並無表露失望或不悅神色，亦無回答任何問題就離開。直到會議結束，彭太懷着喜悅心情，同廿七歲囝囝出來報喜，聲言當選總監好開心，又好得體讚揚李太同自己都係一心一意為女童軍服務。
現任總監木無表情離開
李太事後向本報補充，話好感謝身邊朋友嘅支持者，佢會以平常心面對選舉結果，繼續為女童軍服務。至於被指力撐李太嘅超齡總監邊陳之娟，尋日等到一眾會員散晒後才步出會場，但同樣無答任何問題，木無表情背住記者登上座駕離開。邊太任期尚有三個半月，但女童軍總會尋日已急不及待發新聞稿提早為邊太歌功頌德，讚揚邊太任內對女童軍嘅貢獻。當然，只可惜貢獻背後因為超齡搞到女童軍形象受損。
今次總監選舉，事前「告密」放料不絕，有傳聞言之鑿鑿，話邊太喺背後發功力撐李太參選，延續個人女童軍內嘅影響力云云。而彭太背後亦盛傳得到「大家姐」級數嘅女童軍高層支持。不過，無論今次選舉結果係咪有高人喺背後發功，抑或人心所向投下正義一票，一切已塵埃落定；即使要爭，睇怕都要三年後再爭過。