中環出更：金刀梁籌款 名人無懼寒風撐場
呢排寒氣逼人，不過城中名人做善事嘅熱情卻絲毫未減。啱啱過去嘅星期日（１月２日），香港愛滋病基金會獲太子珠寶鐘錶贊助《愛上鄧麗君》音樂劇門票做善事，好多人無懼寒風，畀面基金會主席「金刀梁」梁智鴻齊撐場，現場熱鬧嘅氣氛驅散唔少寒意。
當晚鄧太同梁太狀甚老友，細問之下，原來太子珠寶主席鄧鉅明（Jimmy）同金刀梁一家人好有淵源，佢哋兩家人嘅囝囝都叫做Eric，生日只差一日添！當然年份唔同嘅。呢幾年，佢哋仲經常喺不同嘅慈善場合碰頭，今年仲係第二年一齊出席聖誕籌款宴會，齊齊過聖誕添！
朱繼陶願為老婆做任何嘢
當晚鄧鉅明太太同梁智鴻太太不約而同着住閃令令嘅靚衫，大家事前都無夾過，鄧太嗰套係自己買，梁太嗰套就係囡囡送，估唔到兩位靚太連着衫都心有靈犀。
太子珠寶做善事，點少得執行董事朱繼陶（Joseph）同太太朱鄧麗萍。卓妮見Joseph姍姍來遲，原來佢去咗泊車。佢笑稱自己係老婆大人嘅司機、攝記兼文書，基本上佢會為太太做任何嘢，因為尊重老婆先至發達嘛！Joseph真係識氹老婆開心。
當晚男高音莫華倫都帶埋太太同囝囝嚟撐場。囝囝今年十四歲，不過生得好高大，媽咪踢爆話，囝囝咁嘅年紀好難買衫，所以有時都會着爸爸嘅衫鞋，當晚佢就着住爸爸對鞋喇。
保安局局長李少光同太太都嚟趁熱鬧，李太講起孫女就甜到漏，話BB女已經十五個月大，識行識表達，好得意。佢仲祈求世界和平，咁老公就冇咁多嘢煩，全家人同全港市民就可以過寧靜嘅生活喎。光哥有個咁得體嘅太太，認真有福！
卓妮