政情：梁栢賢同醫委講Bye Bye
升任醫院管理局行政總裁啱啱兩個月嘅梁栢賢，因為忙於打理全港公立醫院大小事務，決定同醫務委員會講bye-bye，早前主動辭去醫委會委員一職。政府尋日刊憲，佢嘅辭任原來喺呢個月一日已經生效，並改由醫管局策略發展總監羅思偉補上，任期至明年一月廿三日。
梁栢賢話，呢個位本身係由醫管局提名，以往都係委任局內各類總監擔任。不過自從佢做咗醫管局行政總裁之後，已經變成大忙人，最近仲忙於準備新一個年度嘅工作計劃添。梁醫生以往出席醫委會聆訊，經常都係由早聽到晚，比較困身，有啲個案更連審幾日，以今時今日嘅身份，一旦公立醫院有大事發生，佢好難兼顧。做咗醫委會委員年幾，梁栢賢都好唔捨得走，但角色變咗，佢都係決定功成身退，讓位畀其他局內同事負責。
除咗梁栢賢，中大教授沈祖堯做咗中大校長後，亦已辭去醫委會委員嘅職務，據聞醫委會稍後都會再搵人補上。