政情：方文雄倡拓「寶島」旅業
多名政商界名人早前趁聖誕同新年假期，外遊抖番吓，中華總商會副會長、協成行董事總經理方文雄（David）暢遊新加坡後仲有啟發。佢唔係建議港府倣效獅城開辦賭場，而係呼籲港府好好開發大嶼山嘅豐富資源，例如可以借「亞洲車神」黃金寶掀起踩單車熱潮，喺大嶼山興建環島單車徑，配合旅遊發展。
大嶼山建環島單車徑
David形容，大嶼山係一個「寶島」，蘊藏豐富資源有待開發，現時已有天壇大佛、寶蓮禪寺、昂坪360等多個具吸引力景點，港府可考慮喺當地興建環島單車徑，沿途可欣賞優美景致，亦可解決城市單車徑嘅不足。今次David遊獅城，仲深深體會當地駕駛人士納重稅嘅苦況，好似車輛首次登記稅高達百分之三百，電子道路收費又昂貴，相比之下香港養車就容易得多喇，事關收費便宜好多。