政情：葉劉請顧問吸星為實
匯賢智庫葉劉淑儀籌組嘅新民黨，後日就喺柴灣青年廣場舉行領導層就職儀式，象徵正式成立，到時有幾多政治明星捧場，大家引頸以待。明刀明槍加入政黨，唔係人人都方便咁做，早前有傳新民黨「吸星」遇阻力，最新消息，新民黨變陣，延攬曾任局長嘅港交所前行政總裁鄺其志同前廉政專員羅范椒芬等人做顧問，即係以顧問名義變相吸人。
新民黨嘅顧問委員會共十七人，唔少都喺政經界頗具睇頭，好似曾任資訊科技及廣播局局長嘅鄺其志、港區全國人大代表羅范椒芬、前行會成員陳智思、廠商會會長黃友嘉、德昌電機主席汪穗中、偉易達集團主席黃子欣、前會計界立法會議員李家祥、海洋公園主席盛智文同拔萃男書院校長張灼祥咁，其中汪穗中同黃子欣，都係新民黨副主席田北辰嘅好友，剛過檔嘅田二少睇嚟都有貢獻。葉劉尋日預告，到後日舉行就職禮，顧問團成員仲有「驚喜」畀大家喎。
顧問雖然唔係黨員，但實際已經埋咗新民黨堆，大家又睇吓佢哋同葉劉可以產生乜嘢化學作用！