政情：鄉委會改選七國咁亂
村代表選舉喺啱啱過去嘅周日（二日）起一連四個星期日舉行，點知未到廿三日鄉議局主席劉皇發競逐連任龍鼓灘原居民代表嘅重頭戲，周日首天選舉已有出人意表嘅賽果，梅窩鄉事委員會涌口（北）居民代表黃福根及白銀鄉原居民代表黃偉才，雙雙競逐連任失敗，前者更以一票之差落敗。有鄉紳透露，稍後改選嘅多個鄉事委員會選情將更為激烈，七國咁亂，鄉委會分分鐘大變天。
黃福根本身係離島區議員，已擔任兩屆村代表，今次大熱倒灶，唔少人都跌爛眼鏡，傳聞話落敗係因為有獄中人士投下關鍵一票，但無從證實。不過有鄉紳坦言，選舉結果令梅窩鄉委會稍後改選出現暗湧，梅窩十四個村代表，部分人手握兩至三張友好票就爭住要做主席，所以邊個爭贏實在好難預測，淨係睇黃福根嘅支持者臨時轉軚，就知道選情幾咁複雜。
梅窩鄉委會現亂局外，大嶼山南區鄉委會「咸田」原居民代表張勁之及居民代表張玉華同樣連任失敗，加上「水口」兩名村代表放棄連任，令該鄉委會改選倍添變數。早前我哋講過，坪洲鄉委會主席林偉強嘅支持者喺街坊代表選舉中失勢，主席之位危危乎，而屯門鄉委會主席劉皇發亦傳聞會被良田村村代表何君堯挑戰，連任有隱憂。有鄉紳話，雖然發叔喺龍鼓灘村選受到挑戰，但佢老人家肯落場，自然勝算在握，但要冧莊做屯門鄉委會主席就有難度。
坪洲屯門倘換人 洗牌難免
倘若上述四個鄉委會主席換人，新主席就會自動成為所屬地區嘅區議會當然議員。不過，梅窩及大嶼山南兩個鄉委會主席加入區議會，只屬簡單安排，但坪洲及屯門兩個鄉委會主席換人則較為複雜，事關林偉強同發叔分別身兼離島區議會主席及屯門區議會主席，倘若換人，兩位新當然議員四月上任後，兩個區議會將要改選新主席，屆時勢必又喺區議會內部掀起另一番龍爭虎鬥，重新洗牌在所難免。