中環出更：名人新一年投資各師各法
二○一一年伊始，大家都喺度找尋新一年嘅投資機會。尋日中聯辦副主任王志民、港大校長徐立之、新浪總裁兼首席執行官曹國偉、香港青聯主席陳仲尼等一班名人，齊齊出席中國經濟人物年度論壇，大家講起投資大計，可以話各師各法，有人睇好中國資源股及內需股，有人就睇好地產市場，但亦有人繼續睇好黃金嘅升值前景。
徐立之拒買黃金保值
徐校長醉心科學，謙稱對投資無咩研究，咁將來退咗休點算呢？最近就有經濟達人朋友提議佢買黃金保值，校長即時回拒，話屋企無地方擺，後來搞清楚先知原來朋友係叫佢投資黃金，只係會畀張紙佢，唔係買一舊舊見到嘅實金，不過依然打動唔到校長。咁又係，校長「求才不愛財」，話說好多年前佢攞咗一個科學研究學術金牌，佢貪得意拎番實驗室磅吓幾重，發現一個咁「重」嘅學術獎，原來都只係得三安士半重，以當時金價六百加幣一安士計，都真係有限錢，從此校長對錢更加看輕。
校長仲講笑話，同老婆講心唔講金，最多都係送鑽石；都啱嘅，鑽石先係女士嘅永遠朋友。
校長唔愛金，但香港青聯主席陳仲尼同依家忙緊搞「淘至尊」網上商貿平台嘅吳傑莊，就睇好黃金前景。仲尼話銀紙貶值，黃金係唔錯嘅資金避難所。吳傑莊亦都話銀紙可以不停印，但黃金就無可能不斷開採，所以買黃金可以保值。
至於有份搞今次論壇嘅莊士集團執行董事莊家彬就鍾意買銅，事關佢哋屋企有投資銅礦，對銅嘅需求睇高一線。佢哋仲睇好中國內需，對呢類股票
到實。不過通脹始終係一個大問題，身為老闆嘅仲尼準備咗大利是派畀員工過肥年，其中有一個表現卓越嘅員工仲誇張到打一年工出兩年（廿四個月）糧，真係聽見都興奮。
張雅麗睇好內地畫作
男士愛資源，女士就有另類睇法。好似東華主席梁定宇太太張雅麗就鍾情畫作，依家投資內地畫嘅佢，對成名同未成名嘅畫家一樣咁留意，事關經濟好會帶動藝術需求，畫作嘅升值回報分分鐘以倍數計。佢仲話同老公各有各投資，經濟獨立咁話。卡地亞高級珠寶部主管林玉茵就愛買磚頭，專揀半山一帶租客穩定嘅樓盤，入巿兩年，帳面已有卅巴仙回報，相當唔錯。所以話，今時今日嘅女性，絕對不能小覷。
卓妮