最近一輯感冒藥廣告話，感染人嘅應該係音樂，唔係病菌。呢句說話，政府中人真係要聽聽。商務及經濟發展局副局長蘇錦樑尋日上電台講競爭法，強調條例有利消費者同中小企，不斷重複、重複、再重複，聽眾唔知仲以為錄音機食帶，睇嚟政制及內地事務局局長林瑞麟嘅「人肉錄音機」陋習病毒已經不知不覺傳染咗蘇副局。
「林D9」林瑞麟面對傳媒提問或議員質詢，無論大家問乜都好，佢都習慣以不斷重複標準答案做擋箭牌，帶人遊花園，因而被冠以「人肉錄音機」外號。蘇錦樑尋日喺大氣電波講競爭法，無論主持人問乜，佢都好似㩒掣自動播帶咁款，兜嚟兜去，都係嗰句，話條例打大老虎，對普羅大眾同中小企都有利，說話風格，真係好有「林D9」影子。
主持人知唔掂，想搞吓氣氛，叫蘇錦樑對自己嘅政治技巧評分，蘇錦樑又唔敢答，淨係話自己盡量以開放態度聽意見，即係答咗等如無答。