政情：曾德成申亞垂死掙扎
下個禮拜五晏晝召開嘅立法會財務委員會將審議政府申辦二○二三年亞運會撥款，喺依家嘅政治形勢下，幾可肯定撥款唔會得到通過，但民政事務局局長曾德成似乎仲死心不息喎！
立法會民政事務委員會喺當日八點半召開會議，議員陳淑莊早前以緊迫為由，要求討論監管私人遊樂契約，而委員會待議事項一覽表仲列明喺今個月討論添，點知近日睇下議程，呢單嘢冇咗影，反而新加討論對精英運動員加強支援改善其就業前景嘅措施。
陳淑莊去信質問委員會主席葉國謙點解隨便調動議程，阿謙就出示民政局嘅文件，話民政局指精英運動員問題緊迫啲，要求委員會先作討論。
德成局長之前都搬過精英運動員出嚟撐申亞，依家搶住喺財委會審申亞撥款前，又再搬精英運動員出嚟游說議員，擺明係垂死掙扎。但無論佢點掙扎都好，結果可能都係一樣：「判死刑」。畀佢撐埋呢日，成個話題就會正式壽終正寢嘞。