政情：阿涂尼泊爾騎象探險
聖誕前我哋寫過，立法會議員涂謹申太太安排咗同一大班朋友去第三世界嘅尼泊爾旅行，令阿涂頗有怨言。不過阿涂玩完返嚟之後，反而向朋友推介尼泊爾。
阿涂指出，唔好以為冬天去尼泊爾，一定會好凍，但其實除非真係上山，否則十二月下旬當地日間氣溫有成十幾二十度，風和日麗，景色宜人，最重要係佢哋玩足七日機票連食宿，每人平均都只須萬零蚊，認真抵玩。
至於今次旅程最好玩係乜，阿涂就首選騎大象入森林探險，由於大象品性和善，加上佢哋坐喺大象背部，林中其他動物根本睇唔到佢哋，因此可以超近距離觀賞各種野生動物，佢哋見到犀牛三隻，仲有野豬、孔雀同梅花鹿等，唯一辛苦啲係坐象背搖得好厲害，腰骨唔好就咪亂試。
阿涂又話佢哋個導遊本身係大學教授，知道佢係立法會議員後，就同佢大談當地政局，話尼泊爾依家嘅最大政黨原來係毛黨，信奉最原始嘅毛澤東思想，反而內地就一早放棄咗，相當諷刺。