政情：田少蒐證遇惡漢挑釁
自由黨榮譽主席田北俊深入虎穴打老虎！近山頂司徒拔道觀景台一帶「白牌」旅遊車亂咁停車，導致司徒拔道成日塞車，山頂居民同遊客怨聲載道，田少身為旅發局主席，山頂又係自由黨老巢，田少睇唔過眼，上月三十一日朝早十點，單人匹馬揸車直踩事發現場，發現嗰度嘅人，真係好惡。
可能一生都未遇過惡人嘅田少，嗰日將架車泊喺路邊，自己膽粗粗落車，見到現場真係有好多旅遊車塞喺度，就舉起iPhone影相。田少影咗幾張相後，即刻有彪形大漢喺車上衝出嚟，舉機反拍田少，擺明挑釁，而田少亦非省油的燈，又反拍番彪形大漢，先至上車離開，好彩可以全身而退。
我哋問田少當時驚唔驚，佢話：「唔驚，嗰個人仲識叫我田少。」人出名，可能喺緊急關頭有少少着數，但又更容易被人點相，針無兩頭利。田少話，已經去信運輸署投訴，要求處理白牌車問題，有相為證，相信署方會跟進。田少以身犯險，親身舉證，證據確鑿，運輸署仲唔做嘢？
