政情：政府望天打卦求助貴人

立法會秘書處文件指，政府邀請全體立法會議員出席添馬艦發展工程計劃平頂儀式，日期係本月二十五日星期二，時間定喺朝早八點至八點半。

工程平頂儀式一般喺早上舉行，但早到朝早八點開始，似乎係刻意安排，有特別目的，我哋請教過幾位術數師，政府所揀嘅呢個時辰，果然同風水學理不謀而合。

據香港術數家協會術數師楊子東講，從術數而言，二十五日其實並非最好嘅日子，但係計埋時辰，卻係工程平頂嘅最理想時間，當日全日最佳時辰係辰時，即係朝早七時至九時，而時辰中段就最當旺，即係話，八點正係全日最好嘅時間。點好法呢？楊子東話，如果人喺呢個時辰出世，生性慵懶，但若建築物喺呢個時辰做平頂儀式，卻可以利旺貴人。嘩，咁正嘅時辰都畀特區政府揀到，如果話無搵人算過，真係無人信喎。

求證龍景銓 有口難言

我哋打電話畀曾為禮賓府睇風水嘅龍景銓師傅，問佢政府有冇就平頂儀式請教佢，佢話：「我唔可以透露㗎，政府嘅事情，唔想公開。」答案不言而喻。不過對於二十五日朝早八點係咪好時辰，龍師傅即時暢所欲言，話呢個時辰係黃道吉時，「做乜都好」，佢仲話，一般人用五行揀時辰，而佢就係根據已失經傳嘅八卦演算咁話。咁神奇，我哋問龍師傅，有冇入過添馬艦為新政府總部睇風水，佢帶有弦外之音咁話：「我點答你呢？」

回歸後，特區政府成日怨喺立法會無票，施政舉步維艱，又成日被退休前高官開炮鬧番轉頭，眾叛親離，又真係好需要貴人相扶，不過，運程順逆，講到尾都係要靠自己努力，唔係嘅話，賴布衣再世都幫你唔到。