中環出更：劉展灝當旺愛駒爆冷奪冠
新年開始咗幾日，工業總會副主席、運年錶業老闆劉展灝（Stanley）已時來運到，其愛駒「彪形好漢」前晚喺跑馬地出賽爆冷奪冠，為佢帶來卅六萬多元獎金。
驛馬星動 頻頻出埠
「彪形好漢」衝線一刻，卓妮見Stanley同太太及一眾親友振臂歡呼，然後落場拉頭馬及開香檳慶祝，新年收到咁大份禮物，唔開心就假啦，所以佢猛話要食飯慶祝喎！
卓妮同Stanley傾開，原來佢近期驛馬星動，頻頻離港公幹，去年十月先至帶領業界到中東考察，下周四啟程到四川開省政協會議，十七日回港又再飛到瑞士參加鐘錶展，直到二十日返香港。Stanley話，過去一年頻頻撲撲，坐長途機坐到頂唔順，所以希望農曆新年留港陪伴家人度歲，就算離港，相信都係近近哋返內地打高爾夫球。
回顧過去一年，Stanley話其店舖鐘錶生意受惠於內地個人遊旅客來港消費，生意額上升三成，雖然面對商舖租金上升壓力，但佢仍睇好今年市道喎！