中環出更：劉健儀買水晶做結婚賀禮
早排一個星期五黃昏時段，卓妮撞見拎住Coach手袋嘅自由黨主席劉健儀（Miriam）獨自逛中環立法會大樓對開嘅太子大廈，目標對準精品店「寶屋」（Town House），內裏有多款水晶擺設，散發如鑽石般閃爍光芒，原來佢係嚟買水晶做恭賀友人結婚嘅禮物。
Miriam盤算緊買乜好嘅時候，店員主動介紹多款水晶碟，華貴又富時代感，睇見都心動。Miriam踎低喺貨架前揀真啲，決定買一隻可以盛載生果或冷盤嘅水晶碟，足足有成個面盆咁大，碟底有菱形花紋，簡潔雅致，盛惠千多元。
笑指名貴又實用
趁Miriam碌卡之際，卓妮上前打招呼，佢興奮地介紹話，揀咗隻捷克水晶碟送畀朋友，貪佢名貴又實用。有上等水晶碟伴餐，收禮物嘅朋友一定好開心。
捷克水晶工藝世界聞名，喺餐桌上配襯水晶餐具及酒具，更係歐洲皇室貴族傳統。水晶餐具不但令美食添上姿采，更為餐桌帶來浪漫氣氛。
