政情：施祖祥話唔好矯枉過正
梁展文事件令人關注退休高官獲延後利益輸送問題，唔少人都認為廉署應該查落去，甚至幫政府檢討吓啲法例，等第日再發生同類事件嗰陣，就唔使無晒符，不過，喺回歸前做過包括公務員事務司嘅前高官施祖祥又唔係咁睇，仲話市民嘅擔心傾斜咗！
話說佢尋日以廉署審查貪污諮詢委員會主席身份出席廉署簡報會，被問到上述問題，點知施祖祥好似早有準備，話係咪延後利益輸送，要等法庭定奪，但就話政府好有制度，任何退咗休嘅高級公務員，離職後都唔能夠即刻工作，要等一段長時間，之後仲要提出申請，又要等多一段時間，一啲都唔簡單。
佢仲講咗個例子，話廉署執行處有個助理處長過檔監警會，本來大家都係公營機構，無利益衝突，可以即刻返工，但廉署都要佢放晒所有假先畀佢過檔，真係好嚴謹，所以市民毋須過分擔心，否則就會矯枉過正、傾斜咗咁話！