政情：彭冲反擊立會插申亞
港府逆民意提出申辦亞運，早前到立法會民政事務委員會諮詢時，被多名議員狠批外，矛頭更直指港協暨奧委會管治不善及遴選運動員制度唔公平，更指身兼會長嘅立法會議員霍震霆（Tim霍）落力申亞係為咗兒子霍啟剛接棒鋪路。班議員鬧得咁激，Tim霍都唔係省油嘅燈，上月廿四日平安夜透過義務秘書長彭冲去信立法會反擊。
彭冲喺信中澄清議員嘅責難並非事實，然後逐一反駁，強調該會一向恪守五大原則服務香港，而且有客觀標準去甄選合條件嘅運動員代表香港參賽，聲言過程中好難盡如人意，但卻無愧於心，只係落選隊伍傾向指摘球證或旁證判決不公平，唔肯承認技不如人。
申亞問題風波不絕，未到下周五立法會財委會表決申亞撥款，尋日傳出申辦亞運專責小組組長陳育德突然請辭，前日已正式離任，據聞係佢老父最近跌傷，需要佢多啲時間貼身照顧，所以被迫辭職，佢嘅工作將由副組長陳積志頂替，相信對申亞工作影響不大。