政情：光哥學精咗 拉鏈嘴夠密實
究竟前學運領袖王丹和吾爾開希能否來港向司徒華致哀，無論特首或相關官員都做晒鵪鶉唔敢回答，只有個別建制派人士促請港府放行。保安局局長李少光尋日喺香港會所門外現身，被問及學運領袖究竟有冇機會嚟香港，光哥把口好密實，佢笑笑口話：「呢個問題唔答喇，一答畀人鬧呀！」
一早已經打定底
其實對於呢個問題，光哥反應好快，可以講係高官中反應最快嘅一個，佢喺華叔去世當晚已經答過，佢話只要有心，哀悼華叔唔使一定嚟香港，又話香港有獨立嘅出入境政策及制度。佢咁講，其實都係做緊期望管理嘅工夫啫，即係話萬一海外人士嚟唔到致祭，大家都唔使咁失望，只要有心就得嘞。
既然有關方面就學運領袖能否來香港仍然處理中，未有最後決定，光哥今次學精咗，對有關問題索性封口唔講。