政情：仿製柯柏文迷倒陳克勤
立法會議員陳克勤喺啱啱過去嘅聖誕節率領新界青年聯會成員到北京交流，期間參觀過七九八藝術區，見到一件印象難忘嘅展品，就係仿製動漫「變形金剛」領袖柯柏文嘅巨型機械人，足足有四層樓咁高，好似真嘅一樣。克勤話，雖然佢唔係好認識變形金剛，但平時好鍾意砌模型，遇上咁巨大嘅機械人都好興奮，忍唔住同機械人影番張合照。
嘆香港創作空間小
克勤參觀完七九八藝術區後，大讚地方夠晒大，展品又多，相比之下香港嘅創作空間好小，來來去去只有土瓜灣牛棚藝術村、火炭藝術區及石硤尾創意藝術中心，藝術發揮空間好有限。今次北京之行，克勤仲專程去胡同小巷幫襯享譽北京嘅利群烤鴨，佢話烤鴨用古法炮製，肉質帶有木香，好有風味，而且價錢唔貴，值得一試！
