政府為確保政改本地立法順利過關，下令建制派議員空群出動報名參加立法會有關法案審議委員會，除咗要霸住委員會正副主席席位，另一個目標係確保委員會開快車，三個月內完成草案審議同三讀程序，使當局有充足時間完成附屬立法同具體選舉安排。
我哋寫過，喺截止前數小時，已有卅一名、即過半數議員報名參加有關草案委員會。尋日立法會秘書處公布正式名單，再有七名議員趕尾班車入會，即係最後有卅八名委員加入委員會。咁多議員中，泛民主派其實只佔十三人，建制派反而有廿五人，幾乎係泛民嘅兩倍，肯定可保住委員會正副主席席位。主席預計由民建聯譚耀宗出任，副主席據聞係經濟動力林健鋒，即係之前負責審議政改方案嘅小組委員會正副主席翻版。
不過有建制派議員埋怨負責草案嘅政制及內地事務局局長林瑞麟太騰雞，連日來同手下逐個畀建制派奪命追魂call，尤其追嗰啲喺假期外遊嘅委員，確保佢哋趕得切返港出席今早首次會議選正副主席。秘書處尋日發出通知，話十三名泛民委員有五人因事缺席，即係只有八名泛民開會，根本唔使咁騰雞。