政情：陳南祿忙裏難偷閒
肯捱義氣嘅老細，先至可以贏得下屬愛戴。好似陳南祿咁，絕對稱得上係義氣仔女，係人都知香港人鍾意去旅行，每逢大時大節，大家都會串埋幾日假期、遊吓飛機河去旅行輕鬆吓。如果有平機票嘅話，就更加唔使講，收工即刻返屋企執埋行李出發啦。
之但係以前喺國泰做高層嘅陳南祿，明明有大量平機票兼大假，但每逢大時大節佢都犧牲小我，留守大本營做大隊長，事關大時大節，旅客流量多，爆鑊機會大，無人睇住個大本營，有起事上嚟個炸彈都唔知搵邊個拆好，所以咁多年嚟，祿哥話自己都唔會喺長假期放假去旅行，即使機票幾抵佢都不為所動，有同事肯同佢調假，佢都一樣堅持畀班兄弟放先。
不過尋日我哋喺中環撞到祿哥，同佢傾開至知，轉咗工嘅佢，今次聖誕新年一樣無外遊出去攤抖吓。今年佢明明轉咗工做恒隆高層，為咩聖誕繼續留港消費呢？咪就係敬業樂業囉。祿哥話：「我依家喺恒隆，返咗新工咁耐都未出過去，好忙吖嗎，希望遲啲可以出去行吓。」