政情：葉劉外遊捍衞髮型
匯賢智庫主席葉劉淑儀終於籌組咗新民黨，聖誕Boxing Day就陪囡囡榮欣去印尼峇里島玩咗六日，入住五星級酒店散心叉電。峇里以spa聞名，葉劉有酒店每次一千四百蚊嘅豪華spa唔享受，反而着住波鞋周街逛，拖住榮欣去幫襯四十蚊一次嘅街邊按摩店，過平民假期。
葉劉唔恨歎豪華spa，但對頭上三千煩惱絲就絕唔馬虎。葉劉有名句：「連自己個髮型都捍衞唔到，點捍衞國家安全！」佢果然離開香港都要捍衞髮型，按摩可以幫襯街邊店，洗頭恤髮就一定要交畀酒店內嘅高檔salon打理，隔日去一次，每次收費三百蚊，葉劉都話：「價錢唔太貴吖。」
葉劉峇里之旅，日間逛平民市集，夜晚尋覓別致高級餐廳，節目豐富，可惜臨走前一晚，囡囡榮欣留咗部iPhone喺的士，囡囡喊咗成晚，破財事小，葉劉全程靠囡囡部手機影相留影，依家葉劉無法放相上facebook，同大家分享旅遊喜悅，為今次旅遊留下一點遺憾。