政情：田少信秘書多過信iPhone
全球iPhone鬧鐘失靈，名人圈有唔少iPhone迷，中招都唔奇。不過世事無絕對，旅發局主席田北俊就寧願依賴秘書小姐，都唔多用iPhone Apps，因而避過呢場鬧鐘失靈風暴。
田少尋日中午與友人現身中國會食晏，講起手機功能五花八門，佢都嘆為觀止，但係佢份人好傳統，一機在手，只係打出同打入，不作他選；即使手機兼備鬧鐘、重要事項提示等功能，佢都好少掂，理由好簡單：「我有秘書嘛，用唔着。」又係噃，有能幹秘書一眼關七，田少又使乜操心呢！
鄭慕智父女如餅印
轉頭行去香港會，我哋撞見教統局主席鄭慕智（Moses），佢同細女撐完枱腳出嚟，兩父女生成同一個餅印，連笑容都一致。Moses千金好少喺社交圈露面，原來佢喺外國攻讀緊生物化學，近排放假返港共享天倫。見Moses個細女過馬路都玩iPhone，非常投入，不過iPhone鬧鐘佢就話冇用嘞。爸爸Moses另有所好，寧揀其他牌子手機。