政情：申亞撥款民記搞對沖
港府計劃申辦二○二三年亞運會，如無意外，觸礁機會好大，本月十四日上立法會財務委員會申請撥款之日，本嚟應該就係正式封棺之時，但事件突然橫生枝節，北京三月召開人大、政協，巧合嘅係「兩會」嘅預備會就喺今個月十四日於深圳舉行，咁就考起十四名身兼人大、政協嘅「雙料」議員，而且仲隨時令撥款結果出現暗湧。建制派進退兩難，為防範申亞撥款甩轆出意外，正考慮採用議員缺席「對沖」機制，要求支持同反對撥款嘅雙料議員，以「行孖咇」形式配對北上，做法都算破天荒！
所謂議員缺席「對沖」機制，聽落好新鮮，其實運作起上嚟唔複雜。以今次申亞撥款為例，由十四名雙料議員協商，有幾多個支持申亞撥款嘅議員打算上深圳開預備會，就調配幾多個打算投反對票嘅議員「拍拖」北上，咁就唔影響表決撥款嘅正常賽果嘞。立法會議員以「對沖」機制嚟協調，應該係第一次。
金融市場用對沖概念減低投資風險，大家聽得多，政治上運用呢一套亦非首見，呢個做法喺外國早已流行，但應用喺香港議會就係第一次，而且今次提議者原來係民建聯主席譚耀宗。
審視當前申亞撥款投票形勢，民建聯手握關鍵八票，加上廿一名民主派議員同新民黨主席葉劉淑儀，合共三十票，以財委會最多投票人數為五十八名計（立法會主席及財委會主席劉慧卿一般唔投票），剛好足夠否決撥款，但形勢牙煙危險，只要有兩、三人缺席，支持陣營就有可能反敗為勝。
雙料議員 配對北上
按「對沖」機制，若有三名支持撥款嘅雙料議員決定喺十四日上深圳，現有四名雙料議員嘅民建聯，其中三名就可以北上開預備會，譚Sir提出搞「對沖」，換個角度，即係變相攬咗個責任上身，不過如果有支持申亞嘅議員唔生性，應承咗配對北上，又臨時甩底留番喺香港投票，咁就天下大亂，祝佢好運。
我哋打電話問過幾位「雙料」議員，對譚Sir嘅「對沖」機制建議好受落，大讚不失為兼顧人大、政協同立法會職責嘅新做法。不過，依家到底有幾多「雙料」議員打算十四日上深圳開預備會，支持申亞撥款嘅正反比例又係點，就無人講得出，反映構思喺議員間已獲共識，但具體有待落實，估計要到十四日起行前幾日，形勢先至會清晰浮現。