預算案年年閉門造車，「鬍鬚曾」曾俊華今年打開門、走出去，有預算案唔理，走去訪問智利同巴西。鬍鬚曾政績乏善足陳，竟然連外訪旅遊都當係成績，尋日佢喺自己網誌，吹噓自○七年上任財政司司長以嚟，走訪過歐亞多國，仲講到對香港經貿幾咁重要，為自己臉上貼金，絕對唔會面紅。
鬍鬚曾尋日篇網誌，以帶香港商貿高層代表團訪問智利同巴西做引子，文章分為十段，最長嗰段係毫不客氣回顧自己嘅外訪「政績」清單：○七年訪馬來西亞，探討伊斯蘭金融業務；○八年訪印度，「增加了往來航班，雙邊貿易即如立竿見影般大幅增長」；○九年訪俄羅斯，「俄鋁不久就到港掛牌了」……鍾意認叻，人之常情，但作為高官，咁樣自吹自擂，就好易笑死人，好似鬍鬚曾曾經矢言進軍伊斯蘭金融業務，最後雷聲大、雨點小，無咗下文，到真正做出成績先至攞出嚟晒啦，唔該！