政情：維園阿哥棄守「發迹地」
正所謂「輸人唔輸陣」，涉嫌強姦及非禮女粉絲嘅「維園阿哥」任亮憲，自醜聞爆出後，一直懶理會喺現場製造混亂嘅問題，堅持出席佢嘅「發迹地」《城市論壇》，苦了現場一班工作人員。唔知任亮憲係咪終於醒覺，尋日終於冇嚟踩場，一切又回復平靜。
任亮憲自從爆出桃色醜聞後，一直繼續高調出席《城市論壇》，每次都會吸引大批傳媒爭相採訪，唔少市民仲同佢嘅支持者互相指罵，場面混亂之餘，更加搶盡主人家風頭。尋日任亮憲終於冇再現身，大批在場嘅記者同工作人員都鬆一口氣，但佢嘅支持者就繼續以任發起嘅《一零憲章》為名到場。
一個維園阿哥倒下，但睇嚟仲有唔少「阿哥」想抄佢橋循《論壇》上位。我哋最近亦留意到自由黨扎根新西嘅年輕黨員李梓敬同其他維園阿伯一樣，頻頻晨咁早排隊入場參與討論，似乎想增加曝光率，但言論未見突出。佢係咪真係咁有恒心，就要放長雙眼睇吓至知嘞。