政情：減少浸浴范太慳水有法
全國人大常委范徐麗泰尋日出席一個環保團體宣傳珍惜食水嘅活動。原來范太對慳水都有心得，就係減少浸浴喇。范太仲話，佢曾經因為家務助理洗碗時浪費食水睇唔過眼，忍唔住要出聲添。
唔畀開住水龍頭洗碗
范太出席環保團體活動時講起要珍惜食水，佢話大家都應該保持水質清潔，如果唔係我哋嘅子孫就要飲啲經化學處理嘅食水，而唔係天然嘅。對於佢自己點樣慳水法，佢就話沖涼嘅時候多數會用花灑，雖然天寒地凍浸浴係好舒服，但係最多都係一星期一次，間唔中浸吓，等啲皮膚柔軟啲。
不過范太喺家居用水方面真係幾節約㗎。佢話之前請咗個新嘅家務助理，見到家務助理開住個水龍頭洗碗，一路洗啲水一路流，佢就諗︰「點解唔用一盆水洗，洗完再裝一盆過水呢﹖」
經此一役後，范太嚴禁家務助理嘥水，大家不妨考慮吓佢洗碗嘅方法。