政情：金勞詹年晚征星贏千萬
有立法會「賭神」外號嘅金融服務界代表詹培忠，每逢過時過節，都愛到外地賭場玩番兩手，據金勞詹友人講，喺啱啱結束嘅聖誕連新年假期，金勞詹去咗攻打新加坡兩家新賭場，大戰三日，贏咗一百八十萬元加幣，即大約一千萬港元，為二○一○年「戰績」畫上圓滿句號。
金勞詹呢趟年晚收爐之作，並非孤軍作戰，而係有戰友同行，佢哋包咗兩架包機，共約五十人，喺十二月廿七日出發，大戰三日，大部分人都有斬獲，其中金勞詹手風相當之順，贏咗成千萬元，應該夠佢彌補嚟緊兔年派利是嘅開支有凸嘞。
年尾計入新年運
其實，金勞詹喺過去一年已經賭少好多，事關有相士提過佢，二○一○年不利佢嘅賭運，金勞詹今次獅城之行，有同行「戰友」問金勞詹，年尾都贏錢，係咪做過法事抗逆運，金勞詹話，從術數角度，年尾幾日要計入新一年嘅運數中，而佢為一○年埋單計數，的確輸多過贏，所以，術數正確。咦，金勞詹一一年咪會行大運！