政情：嫻姐閂後門拒出山

工聯會參選超級議席，直接影響該會五區直選勝算，點解呢？因為工聯九龍東黃國健同新界西王國興，連任贏面頗大，但葉偉明落新界東挑戰，潘佩璆轉戰港島，勝算難料，若有明星級黨員參選超級議席，就能起「一帶五」嘅戰術效果，帶起工聯整場直選戰嘅氣勢。所以，工聯全力游說曾膺九龍東「票后」嘅嫻姐出山，係有不為外人道嘅苦衷㗎！

強調好享受目前工作

不過，工聯會呢個「一帶五」戰略部署，能否打響至今成疑，更加可以話嫻姐出戰嘅機會愈嚟愈渺茫。點解咁講？嫻姐尋日上電台節目，又被主持人問起競逐超級議席一事，嫻姐話，六月通過政改方案，相信政治生態將有改變，但要佢「上前線打仗」參選超級議席，「咁就未必（會）嘞」！

嫻姐續稱，其實工聯會有實力競逐超級議席嘅人，唔止佢一個，只係工聯會嘅同事想佢出選，重返議會啫。嫻姐以類似拆穿寶藥黨嘅口氣，喺大氣電波拒絕同僚嘅盛情好意，話：「入乜議會啫，要選㗎，要經過幾個大選舉㗎嘛！」強調到呢一刻都好享受目前工作，堅持無意出戰。

嫻姐尋日對競逐超級議席嘅態度，同八月份佢首次回應考慮參選時明顯不同，當時工聯為嫻姐度身訂造，要求政府將超級議席參選資格放寬至前任區議員，而嫻姐對參選欲拒還迎，佢向記者主動透露，有非九龍東選民嘅「粉絲」勸佢參選，想喺超級議席中投佢一票，又唔肯講死唔會參選，無為出戰封死後路。今日，政改本地立法已定案，要選超級議席必先勝出區議會，嫻姐唔想身水身汗蹚渾水，都好正常，工聯想改變嫻姐心意，機會梗係愈嚟愈細啦。

不過，工聯會內部似乎未肯接受呢個殘酷現實喎，黨團召集人黃國健話，嫻姐至今未講死唔肯重出江湖，工聯會一定會繼續游說，希望工夫用得深，鐵柱有朝磨成針喎。希望工聯唔使磨咁耐，磨到影響立法會布陣啦。