中環耳目：莎姐愛君綽軒點心大大粒
自由黨早前立立亂，更觸發退黨潮，搞到退下火線嘅周梁淑怡（莎姐）要出山做副主席平定叛亂。雖然莎姐已經半隻腳踏回自由黨核心，但佢斬釘截鐵同卓妮講，今次只係返去黨幫吓手，最重要依然係享受人生，醉心湊外孫之餘，得閒仲約理三五知己跳吓排排舞（Line Dancing）。
莎姐每星期去北角排舞室跳排排舞之前，例必到位於油街嘅港島海逸君綽酒店五樓「君綽軒」飲茶，卓妮有日去飲茶就咁啱遇到佢，認真有緣。莎姐大讚君綽軒啲點心好好味道，蝦餃同燒賣都大大粒落足料，炸春卷脆卜卜，而且四周環境令人坐得好舒服，每次飲完茶去跳舞，相當就腳。
莎姐已經跳咗九年排排舞，鍾意呢種舞唔使舞伴，又有成班朋友一齊跳，非常熱鬧，跳兩個鐘只係百多元，經濟又好玩。莎姐多年來持之以恒跳排排舞，所以身材適中，保持上佳水準。