中環出更：遊日享天倫 兩散人各有體驗
聖誕節及新年假期轉眼過去，外遊嘅政界名人相繼返港，立法會「五散人」當中嘅陳茂波（Paul）同譚偉豪（Samson），不約而同與家人去咗日本歎世界，回港後仲有新體驗同卓妮分享。阿Paul發現北海道嘅地道壽司竟然唔及香港好味，而Samson一家三口就喺攝氏零下二度體驗民宿生活，點知住咗一晚就凍到頂唔順要轉酒店。
壽司唔好食 民宿凍到震
上月廿三日率先出發嘅阿Paul，一家大細同埋細佬、細妹一行八人，去咗北海道滑雪勝地留壽都度過白色聖誕，來回機票連四晚酒店每人要萬多元。阿Paul話，一日三餐都喺酒店享用，嗰度中西日菜都有，但去得日本當然要試吓地道日本菜啦！點知一個日式套餐要二百蚊港紙之餘，啲壽司竟然及唔上香港，難怪佢有啲失望嘅。
至於Samson嘅遭遇亦不遑多讓，佢哋一家三口喺廿四日平安夜啟程去東京，入住富士山下嘅一間民宿，索價每人一晚八百港元。Samson話，呢間民宿有二百年歷史，充滿家庭氣氛，而且戶主提供一條龍服務，菜同魚都係自家養殖，讓囝囝一嘗入住民宿滋味。
不過，呢間民宿設備太過簡陋，雖然平安夜當晚無落雪，但氣溫只係零下二度，房內只備有識發光嘅電爐一座，開咗成間房暖晒，但最弊房內光到瞓唔到覺，結果Samson一家焗住關上電爐，冒住嚴寒瑟縮度過，第二晚立即改住溫泉酒店。
講到尾，兩散人呢次日本之行醉翁之意不在旅行，而係趁住立法會無咁忙嘅時間，同家人共享天倫，就算啲嘢唔係咁好食或者要捱凍過平安夜都無所謂啦！
卓妮