中環出更:運動員愛心長跑 名人出錢出力

精英運動員協會尋日大除夕舉行第十屆毅力十二愛心跑,由下午四時一直跑到午夜十二時,迎接新一年來臨,為精英運動員慈善基金及再生會籌款。嘉賓除咗奧運滑浪風帆金牌得主「風之后」李麗珊、綽號「神奇小子」嘅亞運桌球金牌得主傅家俊、亞運羽毛球銅牌得主「黑妹」葉姵延外,仲有三個國家奧運金牌運動員、發展局局長林鄭月娥、港協暨奧委會會長霍震霆、合和實業董事總經理胡文新(Thomas)、精英運動員協會會長胡經昌及熱愛體育嘅許晉奎等,個個為體育出錢出力。

眾多嘉賓之中,林鄭稱得上係長期捧場客,事關佢做社會福利署署長時已參加過呢個活動,即使後期換咗崗位,都有繼續參加支持,難怪司儀話林鄭已經同呢個活動成為朋友。卓妮喺現場所見,林鄭唔係參加咁簡單,仲出錢以示支持,佢喺現場籌款攤位掃貨,總共用咗一千五百元,分兩次買咗十五條深色頸巾及幾隻玻璃碗,話用來喺農曆新年送畀有需要嘅長者,善心滿瀉。

林鄭都知單車徑唔掂

卓妮發現,做善事真係會傳染嘅,好似有攤位就捐出一架價值一千八百元嘅單車畀大家競投籌款,「亞洲車神」黃金寶仲喺單車兩邊車身簽名,Thomas、胡經昌及許晉奎二話不說每人捐出二千元競投,但佢哋無攞走架單車,留畀其他善心人再投過。問林鄭有冇興趣競投架單車,佢就話暫時唔會買單車住,等香港啲單車徑興建好先至買喎。

一班名人掏荷包力撐精英運動員外,內地三個國家級運動員都山長水遠嚟香港打氣,包括奧運男子體操個人全能金牌得主楊威、奧運跳水金牌得主李娜及奧運二十公里競步金牌得主王麗萍,淨係誠意已經睇到運動員嗰份體育精神,「友誼第一,比賽第二」,盼望香港運動員能有出頭天!

卓妮

Money18新功能「18好路數」為你預測心水股票升跌機會率