政情：郭位下廚show秘方醃肉
生於台灣嘅城市大學校長郭位，唔止識食，仲會下廚，只係自○八年來港上任後，忙到入唔到廚房，英雄無用武之地。不過尋日郭位校長搞咗個ＢＢＱ，同傳媒朋友賀聖誕，仲秘製韓式牛仔骨同雞翼。
郭位校長為今次ＢＢＱ，事事親力親為，參考埋食譜睇吓點醃肉，令人感動。讀開理科工程學嘅佢，對點樣整烤肉好有心得，燒出來嘅牛仔骨又鬆又香，究竟有咩秘訣呢？校長揭開謎底，話牛仔骨用啤酒醃過，皆因啤酒內嘅二氧化碳滲透入牛肉，加熱後二氧化碳發脹，就會令牛肉變得鬆軟。佢仲話，要用埋切粒嘅雪梨醃牛仔骨，咁樣牛肉就又香又甜。花咁多心血整嘅牛仔骨，人人食完都讚好！聖誕期間，郭位校長專程為招生去咗台灣兩日，希望吸引更多台生升讀城大；放假都不忘工作，真係勤力。