政情：張文睇曼聯high過遊埠
聖誕新年都係普天同慶嘅日子，唔少議員趁立法會放假外遊。教育界立法會議員張文光啱啱去完台北掃書同食小食，不過本身係曼聯粉絲嘅張文，響台灣返到酒店都唔瞓睇波，見到曼聯贏波，話興奮過去景點。
鍾意外遊嘅張文話去過Ｎ次台灣，聖誕假期同老婆「翻叮」，雖然只係去士林夜市、西門町、淡水同九份等景點，但難得食番水煎包同炸大雞扒等地道小食，重拾拍拖嘅情懷。適逢圓山公園附近有高更藝術展，展出喺大溪地時期嘅五十幾幅油畫同雕刻品，張文都去開眼界，大讚全部展品都有水準。
台灣近日搞緊花博展覽，不過張文就話無興趣，只係入去行咗個圈。講到香港展區內用花砌成嘅尖沙咀鐘樓同海洋公園海豚，張文話唔算有特色，唔知佢之後會唔會追究番港府喺花博使咗幾多錢、係咪符合衡工量值原則？