政情：林輝幫前「情敵」講好話
「維園阿哥」任亮憲涉嫌強姦非禮案，事件鬧得滿城風雨，唔少人得知佢入政圈後到處留情，都對佢大打折扣，佢嘅前女友周澄更多次公開批評佢人格有問題。不過同樣做過周澄男友嘅社運人士林輝，並冇趁機向前「情敵」落井下石，仲幫佢講好說話添。
港台尋日公布《晨光第一線二○一○風雲人物大選》，近期搞到一身蟻嘅任亮憲、八十後青年林輝都分別有上榜。
任亮憲案 促警勿再拖
心水清嘅讀者應該仲記得林輝係周澄嘅前男友，可惜任亮憲尋日唔知係咪有心避席唔出現，否則兩名舊愛同場嘅場面都會幾趣怪。
講起任亮憲，林輝好得體話，同任相識一場，見到佢唔會尷尬；佢仲希望警方可以快啲決定係咪落案起訴佢，唔好死拖，否則對大家都冇好處。佢又承認好耐冇見過周澄，莫非大家再見不是朋友？無論點都好，林輝開到口叫警方咪再拖，都算係幫任亮憲講嘢，唔知周澄又點諗？