政情：橄欖率1111醒獅挑戰健力士
中國人過時過節，總愛舞龍醒獅。聽日係二○一一年一月一日元旦，立法會議員「橄欖」陳鑑林牽頭發起嘅「龍獅節」，獲盛事基金撥款一百萬元，又揼潮州商會同潮屬社團總會心口共五十萬元，再加上圓玄學院等贊助，召集一千一百一十一條醒獅，喺尖沙咀廣東道一齊舞獅加巡遊，並已申請列入健力士世界紀錄。橄欖為見證歷史，仲會粉墨登場落場舞獅，大家不妨到場睇吓佢嘅功架。
元旦尖沙咀巡遊
首屆「龍獅節」聽日下午二時喺尖沙咀廣東道一帶舉行，重頭戲係「４條１」逾千隻醒獅，伴同兩條各二百二十呎長巨龍共舞，場面壯觀，目標係刷新○八年喺新加坡創下三百五十三人嘅舞獅紀錄，屆時除咗身兼「龍獅節」籌備委員會召集人嘅橄欖會上陣舞埋一份外，大會仲請嚟電影《葉問前傳》男主角杜宇航、小師妹陳嘉桓同打星樊少皇，一齊舞獅助興，聽日尖沙咀廣東道肯定好熱鬧。
「龍獅節」舞完醒獅，仲有好戲在後頭，就係醒獅巡遊嘞。獅隊以廣東道1881主禮台為起點，途經尖沙咀文化中心、星光大道同百周年紀念公園，大家可以喺廣東道及文化中心幾個點睇巡遊；大會仲安排咗幾十隻獅子喺星光大道同市民近距離接觸；文化中心更有潮劇表演，潮州文化愛好者不容錯過。