政情：葉劉組黨食尖子檸檬
明日就踏入二○一一年，匯賢智庫葉劉淑儀嘅政治生涯亦將掀開新一頁，事關由佢牽頭創立嘅新民黨，領導層就職儀式下月九日舉行。葉太正忙着為新民黨對外招賢納士，但顧此失彼，旗下匯賢智庫原有班底卻有漏網之魚，包括葉太曾力撐參選薄扶林區議會補選嘅牛津「尖子」劉應東在內嘅多名金融專才，由於職業關係，唔方便孭住個政黨招牌，最後打消入黨念頭，送咗檸檬畀葉劉做聖誕禮物。
葉劉組黨，以匯賢智庫為骨幹，政界人士就好似聖誕飾物，逐件掛上去，順利嘅話，希望營造星光熠熠嘅視覺效果。聖誕飾物金光閃閃，固然好睇，不過，樹幹枝葉先至係立黨根基。正當新民黨執委會就職儀式籌辦得如火如荼之際，突然有消息傳出，匯賢智庫內一直跟隨葉劉嘅多名尖子，包括打正匯賢智庫旗號參選過區議會南薄扶林補選嘅劉應東，都無加盟新民黨，到底發生乜嘢事？
劉應東接受我哋訪問時，承認無跟葉劉一齊過檔新民黨。佢解釋，葉劉有邀請佢入黨，但佢喺投資銀行工作，若明刀明槍加入政黨，要向公司申請，難度好高，所以知難而退，打消入黨念頭。劉應東仲話，佢擔任匯賢智庫名譽財務顧問，其實屬義工性質，葉太旗下尖子如雲，少佢一個唔少，相信對新民黨唔會有乜影響喎。
劉應東一度受力捧
劉應東一向被外界視為係葉劉力捧嘅新人，英國名牌學府牛津大學金融系畢業，攞埋碩士銜頭後返港發展，依家喺一家投資銀行做高層，年中匯賢智庫陳岳鵬過檔做特首辦特別助理，辭任南區區議員，獲葉劉相中，力撐出戰補選，雖然最終不敵公民黨司馬文，但經此一役，總算嶄露頭角。依家葉劉組黨，劉應東卻過門不入，相信葉劉都幾失望。
我哋打電話畀正陪家人去印尼旅行散心嘅葉劉，佢承認，匯賢智庫舊有班底中，的確有人因從事金融或喺外資企業打工，唔方便加盟新民黨，佢非常體諒，又強調有關人等只佔匯賢智庫極小部分，對新民黨無影響。至於人數有幾多，葉劉只係話：「有三幾個，唔一定係小朋友，大人都有。」即係話，無跟葉劉過檔新民黨嘅匯賢智庫舊人中，唔止年輕尖子，唔同年齡嘅都有。