中環出更：莊家彬未滑雪先傷臉
每年聖誕節到翌年農曆新年，好多港人都蜂擁到外國滑雪，好似九巴後人雷禮權（William）咁，就幾乎年年都同太太去滑雪，今年仲定咗喺農曆新年後到意大利北部阿爾卑斯山度假，享受二人世界。原來嗰段時間莊士集團太子爺莊家彬（Albert）都打算去日本滑雪，早前仲為呢次旅程添置新嘅滑雪新裝備，點知試眼罩期間，不幸發生小意外。
霍啟剛助燃興趣
卓妮早前喺青年工業家協會就職晚宴上巧遇Albert，佢笑稱掹衫尾跟住金利來集團副主席曾智明嚟湊熱鬧，同場仲有菁英會常務副主席洪為民，三人合照時，Albert就拜託卓妮影側啲，因為佢右邊臉
損咗，近睇紅咗一撻。Albert話，屋企嘅滑雪裝備用咗逾十年，於是重新購置過新裝備，點知試眼罩時，唔小心畀眼罩掛住嘅廣告紙牌刮損右邊臉，睇怕最心痛嘅應該係佢女友傅明憲。
其實Albert喺美國讀大學時已開始滑雪，有超過十年滑雪經驗，當年每逢學校放假，都會約埋三五知己去科羅拉多州滑雪，租間度假屋，冰天雪地一齊打邊爐，好玩到極！不過自從○三年畢業回港後已再無滑雪，直至今年農曆年初二藉加拿大冬季運動會之便，同港協暨奧委會義務副秘書長霍啟剛去Whistler滑雪，才重燃滑雪嘅興趣。咁Albert豈不是要多謝啟剛？