中環出更：「愛上鄧麗君」政商名人盡興
「愛上鄧麗君」音樂劇尋晚喺尖沙咀文化中心舉行首映，民建聯副主席蔣麗芸（Ann）以友情價包場為黨籌款，反應熱烈。卓妮同在場嘉賓傾開，原來今晚除夕夜好多都節目豐富。有份贊助音樂劇嘅太子珠寶鐘錶主席鄧鉅明同姐夫執董朱繼陶，就會喺香格里拉酒店開Party慶祝公司廿六周年紀念，順道與員工一齊倒數。
除夕各自各精彩
除咗開Ｐ，一家人齊齊整整食餐飯一樣開心。阿Ann今晚會同家人到酒樓食飯慶祝，立法會議員「象哥」黃定光就同家人及朋友啟程上中山間渡假屋燒野食，佢話去到咁遠都係想避開啲電話喎。至於金城營造主席王國強就要連走兩場，下午到大嶼山竹篙灣出席童軍百周年大露營，再趕返市區參加夜晚旅發局嘅除夕倒數詠香江。
卓妮尋日仲遇到久違了的前立法會議員蔡素玉，佢帶埋八十六歲嘅媽咪去聽歌。問蔡菜子來年有乜大計，佢話已將二○一一年定為旅遊年，初步計劃二月去廣西自駕遊，四月再到約旦、敍利亞及黎巴嫩旅行，之後再遊美國黃石公園，果然好識嘆世界。
尋晚場音樂劇，好多名人捧場，除咗上述提過嘅名人外，仲有身為主人家嘅民記監委會主席楊孫西、主席譚耀宗、副主席劉江華以及主禮嘉賓政務司司長等，立法會會計界議員陳健波夫婦、盧文端兒子盧金榮夫婦、民記新星葛珮帆等都有現身，籌款額較預期多出一成，身為搞手嘅阿Ann真係飲得杯落！
