周國豐囝囝係音樂神童？
年頭添丁嘅周國豐（Brandon），出名係廿四孝老竇，一放假就陪太太及囝囝周禮淳行街街，一家三口日前現身中環ifc食晏，提早慶祝聖誕。禮淳未識食聖誕大餐，躲喺媽咪懷中欣賞美食，一樣咁開心。
十個月大 獲贈鋼琴
Brandon自爆送咗一個鋼琴玩具畀BB。禮淳只有十個月大，咁快識彈琴!?非也，旨在啟發BB心智啫。不過咪睇小禮淳，原來佢音樂感十足。周太話，前排安排囝囝上BB音樂班，見佢聽見老師彈奏哀怨嘅樂曲時，竟然會扁晒嘴想喊，感情咁豐富，話唔定係音樂神童。
Brandon同太太向來係ball場常客，不過聖誕夜就返璞歸真，同家人喺屋企靜靜哋度過。周太Jenny話，呢排天氣凍，唔小心染上感冒，為免傳染畀BB，暫時由Brandon做住湊仔公。