政情：哪吒崇拜嫻姐扶後輩
「哪吒」方國珊退出自由黨已經一個月，至今未有新歸宿，前日我哋喺沙田馬場遇上現時「單身」嘅佢，問佢對加盟其他政黨有決定未？哪吒表現得全不着緊，反而擔憂本港政壇唔健康，年輕力量太少，又話好佩服工聯會「嫻姐」陳婉嫻肯扶掖後輩，係人都聽得出佢話中有話。
哪吒離開自由黨，據傳主因佢多年備戰二○一二年參選新界東，但田北辰退黨，令情況有變，前自由黨田北俊部署再戰新東，所以令哪吒憤而出走。哪吒前日話，依家政壇「將多兵少，個個都係皇帝」，又指政壇年輕力量太少，真係好佩服嫻姐能夠讓賢，○八年以排名單第二名參選，畀新人當選，聽落哪吒話中有話，唔知係咪影射緊自由黨呢？
不過，哪吒強調，佢並非針對某個政黨，只係講緊整個政壇現象，叫大家唔好多心，又話自己現時傾向同經濟動力及民建聯等政黨先合作吓，互相摸索，慢慢再講加盟之事。哪吒從政心堅決，又難怪佢對新人難出頭問題咁大感慨嘅。