中環出更：林以諾陳欽杰High Tea鬥玩機
智能手機同埋社交網站已經改變咗呢一代人嘅社交模式，好多後生仔同朋友坐低聚會，傾談唔多，多數時間拎住部手機係咁篤。不過，呢個習慣唔係後生仔嘅專利，早前鬼馬牧師林以諾同埋慕詩（Moiselle）主席陳欽杰（Boby）相約歎下午茶，兩個大男人都好似大細路係咁篤手機，「此時無聲勝有聲」嘅境界原來係咁。
早前一個星期四下午三點幾，卓妮行經名人high tea熱門蒲點中環Cafe Landmark，見到着咗件格仔恤衫嘅林牧師入座先，佢一時傾電話、一時環顧四方，一睇就知佢等緊人。
分享新發現
大約十分鐘，打扮輕鬆嘅Boby趕到，佢着咗件牛仔褲襯白色波鞋，同平時執到好正嘅貪靚打扮相比較，有另一種隨性嘅穿衣風格。卓妮見佢哋兩個傾談時間唔多，期間兩人分別把玩手機，林牧師睇到好嘢仲同坐對面嘅Boby分享，唔知佢有咩新發現？冇幾耐食物上枱，兩位虔誠嘅基督徒齊齊合掌祈禱、開餐，歎完茶點後，約個幾小時兩位大忙人就一齊離開嘞！
卓妮上前同林牧師打招呼，佢話聖誕節期間冇咩特別嘢做，都係忙教會啲嘢。林牧師傳道時嘅風格鬼馬有趣，同傳統牧師形象好唔同，相信聽過佢佈道棟篤笑同埋娛樂性豐富嘅DVD之人，都好期望佢再次踏上大舞台。
Boby同埋太太徐巧嬌嘅基督徒背景亦都廣為人知，佢哋經常喺基督教刊物同埋活動中作見證，又贊助基督教嘅福音工作。兩年幾前，佢哋兩夫婦仲一齊喺林以諾主持嘅《另類聊法企業版》DVD中現身說法添。