政情：四大商會追打劉吳惠蘭
競爭法絕對係今屆立法會會期嘅「惹火尤物」，商界議員對佢窮追猛打，負責推條例嘅商務及經濟發展局副局長蘇錦樑就慘成箭靶。不過亦都有人睇佢唔上眼，話凡事都要對準目標，局長劉吳惠蘭至係追打嘅對象。
競爭法向來都係由蘇錦樑負責，不過競爭法爭議多多，推出之後，反對聲音未停過，一直都有傳聞話四大商會都好唔滿意，四大商會今日將會罕有地一齊會見劉吳惠蘭表達訴求。廠商會議員林大輝尋日好老實咁話，傾競爭法要「竹門對竹門」，四大商會要搵更高層次嘅人「對嘴」，蘇錦樑滿足唔到佢哋喎。
律師會會長王桂壎尋日出席廠商會嘅午宴時話，草案出台後，社會各界都睇中佢律師會會長嘅身份，不斷叫佢發表意見。有人叫佢出手「砌低」競爭法，有人就叫佢唔好踩得咁勁，搞到佢左右不是人，所以佢決定以後只會從純法律角度發表對競爭法意見，保持中立。