政情：華叔硬
「諾貝爾金牌」
支聯會主席司徒華喺醫院養病，唔方便四圍去，不過佢嘅黨友林子健好有心，專登去華叔家鄉開平拍低當地嘅點滴畀華叔睇，仲喺開平搵到一條司徒村，逗得華叔好開心。至於剛剛去完挪威出席諾貝爾和平獎頒獎禮嘅何俊仁，就買咗兩個朱古力「諾貝爾金牌」畀華叔食。
家鄉有條司徒村
前日探過華叔嘅何俊仁話，華叔精神唔錯。根據華叔講，喺三年零八個月嘅淪陷期間，佢返咗開平避難，喺鄉下讀過書，而林子健嘅舅公做過華叔老師。林子健除咗拍片畀華叔睇，仲同華叔講解喺司徒村嘅所見所聞，華叔猛話有印象。
何俊仁仲喺挪威買咗兩個朱古力「諾貝爾金牌」畀華叔食，又帶咗一件由多位民運人士簽名要求釋放劉曉波嘅Tee恤畀華叔。原來頒獎典禮當晚，華叔一邊睇住直播，一邊好激動話想去現場睇，可見華叔依然好關心社會大事，何俊仁仲透露諗住今個月廿三日搞番場聖誕聯歡會，同華叔慶祝吓。