政情：大舊石寸鬍鬚曾 作風似軍閥

財政司司長曾俊華同運輸及房屋局局長鄭汝樺喺額外印花稅適用範圍上，說法「一時一樣」搞出好多混亂。代表地產及建造界嘅立法會議員石禮謙尋日好勞氣，話財爺就好似嗰套《大軍閥》電影劇情咁，大軍閥打麻雀，單吊一索急住食胡，有人打一筒都照食，話係小鳥肚餓要食餅；倒轉頭人哋用同樣方法食胡又唔畀，話小鳥已經食飽咗喇。石禮謙咁講，即係暗寸鬍鬚曾同鄭汝樺，有佢哋講無人講，講一套做一套！